News


12 Dez

Probeweekend 2017

Wo dr Kevin uns d Bessamligszyt und d Eckpünkt vom diesjöhrige Probeweekend duregä hed, isch sofort klar gsi, das gid e strängs Wucheend. Obwohls mir erlichgseid chli gstunke hed am viertel vor 7i in Füllinsdorf si, ha ich mi riesig uf die Zyt mit de Elbisrugger gfreut.

Bi strömendem Rege bi ich pünktlich bim Elefantehuus acho und au alli andere sin scho besammlet gsi. Nur dr Car hed no gfehlt?! Wo de ächtsch steckt?

Wo denn dr Car cho isch, hed me denn erstuunlich speditiv glade und nochere kurze Begrüessig vom Hanspeter Niklaus(besser als Hansi bekannt ;-)) ischs denn scho losgange.

Uf dr Fahrt sin hinde chli die durstrige und vorne die wo sich chli meh uf d Kürvli müen konzentriere gsesse, ich glaub alli hän sich uf unsers Zielort und die gmeinsame, bevorstehende  Stunde gfreut.

In Zweisimme acho, (au bi Rege) hän mir rasch unseri  Zimmer bezoge und scho hed  dr  erschti Probeblock agfange.

In dene zwei Täg chöne mir in getrennte oder gmeinsame Probe alli neue und au alte Lieder intensiv üebe, Froge oder Unsicherheite  grad bespreche und hän au Zyt in Registerprobe Lieder z perfektioniere oder au e neus Lied zämme aluege. Dr Schlag hed denn au immer d Möglichkeit und Zyt  e neus Schlagzügsolo z kreiire. Das isch für uns immer e bsunderi Aglegeheit do mir unseri Fans jedes Joor miteme neue und vorallem komplett andere Solo wänn überrasche. Do hän mir uns selber d Messlatte sehr hoch glegt und das Joor au bsunders Mühe ka unserer Kreativität freie lauf z loh.

Leider stoht no kei Schlagzügsolo, doch mir gän nid uf. Bis jetzt hän mirs jedes Joor gschafft. Es gid viel Künstler die chöne nur unter grossem Zytdruck richtig gueti Werk erschaffe ;-) D Hoffnig stirbt bekanntlich z letscht…

Mi persönlich hed de sehr aspruchsvolli Samschtig guet gfalle und mir sin au wider kulinarisch verwöhnt worde. Noch em feine Znacht nomol e kurzi Gsammtprob und denn ischs scho mit em gmüetliche „Unterhaltigsobe“ organisiert vom Raul und dr Sandra losgange.

Obwohl, gmüetlich hed er gstartet… und fascht immene Kleikrieg geendet.

Mir sin in 3 Gruppe ufteilt worde und hän verschiedeni luschtigi Spieli müesse mache. Bi jedem Spiel heds Pünkt gä. Me hed so denn im Verlauf vo dem Obe  bim eint oder andere versteckti , stark usprägti, ergizigi Karakterzüg kenneglernt und ich muess scho erlich sage, e Zytli hani scho chli Angst ka.

Doch wie in jedere Familie heds denn au in dr Elbisfamilie wider Friede gä und mir sin so no lang gmüetlich zämmegsesse.

 Ich verzicht jetzt extra druf dr Gwünner vo dem „Unterhaltigsobe“ z erwähne, do das ziemlich unwichtig isch. Doch die tolle Gwünner- Säckli vom Raul zämmegstellt, sin hald scho verlockend gsi. An dere Stell nomol e grosses Dankschön an Raul und d Sandra, es isch wirklich sehr „unterhaltsam“ gsi.

Was i nid dörf vergesse z erwähne, wies überhaupt drzue cho isch, das ich do de Bricht in mi Laptop döckele.

 Letschtjoor ha ich im Probeweekend gfehlt, s Joor vorher  aber hän mir in änlicher Zimmerbsetzig e nächtliche Bsuech vome Ninja becho. Ich ha denn zu de andere gseid, dass wenn uns das Joor de Ninja wider e Bsuech abstatte, ich dr Bricht schrib.

Mir sin grad in Schlofsack gschlüpft, e paar hän au scho gschlofe,  plötzlich polteret dr Ninja ganz lutlos ins Zimmer …. E paar sin scho chli verschrocke, ich ha vor allem miesse lache.

Do dr Ninja unsichtbar isch, blibt sini Identität e Gheimniss, was ich aber chli verdächtig gfunde ha,  am nächste morge hed dr Toni chli ghumplet und sich dr Rucke gstützt. Öb er ächt dr gheimnisvolli Ninja us Zweisimme isch??? Mir werdes nie erfahre.

In der Nacht heds dicki Flocke gschneit und mir sin inere schöne aber kalte Winterlandschaft verwache. Am 9 i hän sich denn alli mehr oder weniger usgschlofe zume feine Zmorge troffe.

Mir hän denn nomol probt bis zum Mittagesse und uns drnoch warm ipackt für d Marschprob besammlet. Do heds jetzt für die neue s erchtmol gheisse, spiele und laufe in Kombination.  Ich mag mi no sehr guet erinnere, dass  das alles andere als eifach isch und ich find dir händ das alli super gmacht.

Und fürs Protokoll, ich ha das Wucheend e paar mol Hüehnerhut ka ;-)

Und schowider heisst s Gepäck in Car verlade und heimeszue fahre. Ich denk mir hän alli sehr viel vo dem Wucheend profitiert, sigs musikalisch oder kameradschaftlich. Mir heds wie immer super gfalle und ich will mi au nomol bi unserem neue Major im Kevin für sini Arbet und si Isatz bedanke, er hed us minere Sicht e super Job gmacht. Für ihn sins sicher au 2 aspruchsvolli, lerrichi und schöni Täg gsi.

Viele Dank euch allne für das Wucheend. Ich freu mi scho riesig uf d Fasnacht.

 

Sabrina Strub

27 Nov

Neumitgliederprobe 2018

30 Nov

Probeweekend

Probeweekend 28+29.11.2015

Für mi definitiv viel z früeh am Morge, treffe mir uns alli am 6.45 Uhr bim E-Huus. Vo död us gods mitem Car und unserem neue Chaffeur em Neumitglied Oli witer richtig Zweisimme. Miteme kurze Pipi-,Kaffi-, Ziggistop uf dr Raststätt gods direkt ins liecht verschneite Berner Oberland. D Strosse sin schneebedeckt und echli rutschig gsi, doch dr Oli hed uns sicher zum Musikhuus brocht. Nochdem mir denn alli d Zimmer bezoge , jede sis Schlofplätzli grob igrichtet und fascht alli ihre Schlofsack usbreitet hän, treffe mir uns bereits zur 1. Prob vom hüttige Tag. Mir hed dä Tag musikalisch und au kammeradschaftlich sehr guet gfalle und au s Esse isch usgezeichnet gsi. So ca. ab de 9i hän mir denn unseri Instrument für dr  1. Probetag „kompakt“ zämmegstellt und sin in dr gmüetlich Teil übergange.

Bis in die frühe Morgestund sin mir zämme gsässe. Die einte hän Ping Pong gspielt die andere hän sich in e Kreis gsetzt und über „Gott und die Welt“ philosophiert. E sehr amüsants „Rahmspiel“ offeriert vo dr Manuela hed au no für e lustigi Atmosphäre gsorgt, gäll Alessio :-) In 2 Gruppe ufteilt, hän mir denn au no chli öbis für unseri Hirnzelle gmacht und ABC DRS3 gspielt…. Ich ha scho lang nüm so viel und so fescht glache und au unsers Neumitglied Isi hed mit Gsang und Tanz drfür gsorgt das me d Buch-und Kiefermuskle am andere Tag gspührt hed :-) Wo ich denn langsam richtig Bett ha welle, hän e paar Zimmergnosse aber gar noni ans Schlofe dänkt. Immer wieder hed öber dr Kopf dure Türrahme gstreckt, mit Schnee küehlts Wasser isch no serviert worde und sogar e Ninja isch fascht grüschlos und unsichtbar in unsers Zimmer ihne „polteret“!:-) Irgendwenn ischs aber denn liesliger worde (fascht in jedem Bett mucksmüsli still) und mir sin denn igschlofe,  au die wo ohni Taschelampe vom I-Phone s Bett hän miesse suche hän do dra nüd gänderet…

Am negschte Morge isch ein nochem andere , notürlig früsch und munter, im Essruum itrudlet. Noch 1-2 Kaffi und chli öbis feschtem im Mage, hän mir denn au scho wider afo probe. Unsers neue Stück hed denn sogar  e paarne  Träne in d Auge triebe, sooo…  schöööön…
Nach em Mittagesse sin mir denn no chli use go musiziere, aber dos chli ungmüetlich nass gsi isch hed unsere Major uns nid lang durchs Dorf gjagt . Noch es paar Stück und em neue „Brädscher“ hän mir denn scho bald unseri  siebe Sacher  zämme packt und hän uns vom Oli oder au „heisser Ofen genannt“  sicher zrugg ins Baselbiet lo chauffiere. Danke nomol Oli fürs fahre und au im Zweili danke für das Wucheend.

Sabrina Strub

19 Aug

Cliquereis

Elbisrugger Cliquereis 27./28.06.2015

 

Pünktlich am 08:00 het eusi Cliquereis bim Elefantehuus gstartet. Es si alli scho sehr guät gluunt gsi und au dasmol isch am Morgä scho ä riisä gaudi gsi im Car. Natürlich het mä au scho s erschtä Bier klöpft. Dr Dodo, wo übrigens d Reis organisiert, het eus nachdäm mir abgfahrä si drüber informiert dass eusi Reis in richtig Züri-Oberland wird füährä. Uf dr höchi Winterthur het er den s Programm bekannt geh. Mir wärdä ä Bierbrauärei besichtigä und dörfä euses eigänä Grundnahrungsmittel brauä. Das isch doch mol öbis würd ich sägä. Mir si den scho glie bi däm Buurähof a cho wo Hopfe-Tropfe gnennt wird. Als erschts hei mr ä chlini stärkig becho, s het Kaffi ( Bier)und Gipfeli geh. Im Aschluss het eus dr Braumeister allerlei sachä verzellt wos brucht zum Bier härstellä. Hopfe-Tropfe isch diä chlinsti offiziell gmäldeti Brauerei vo dr Schwiiz. Nach derä Theortischä Phasä ischs den los gangä. Mir hei and Arbeit dörfä. Dr Braumeister het natürlich Schritt für Schritt gseit was wo dri chunt und wiäviel vo was. Suscht wärs glaub nit guät cho. Nachdäm mir das alles verarbeitet hei und dr Ablauf somit beendet gsi isch, simmer ufä Rundgang wo dur diä Hopfäfälder gfüährt hei. Dr Braumeister het sehr vill verzellt vo denä Hopfästudä und dr Bierkulture im Land.

Langsam het bi jedem dr Buch afo chnurrä und het s Zmittag scho chum chönä erwartä. Nach dr wohlverdientä Mittagspausä ischs den mit dr Buureolympiade witergangä. Es hei diversi Spili stattgfundä. Mir hei eus in zwöi Teams ufteilt, so hets den Frauä gegä Mannä gheissä. A gfange heimer miteme chliine Hindernissparcour ufem Tisch. Mä het mit Blosä ä Hopfäblüätä müäsä dur diä Hinderniss bringä wo am Schluss imä chlinä Tällerli het müäsä si. Es isch hecktisch gsi das ganzä, aber extrem amüsant. Witergangä ischs mit Bierdeckelwärfä den isch Rugelicurling cho, äs Puzzli mit Harassä heimer versuächt, den s föiftä höch uf langä Ski vorwärts z cho mitemä Bächer Wasser in dr Hand, wo am Schluss no hät sötä voll si. Z guäterletscht natürlich no Gummistiefelwärfe. Ä teil hei das au miteme Salto machä verwächslet. Somit heimer d Olympiadä beendet. S Käthi, eusi Schiri Frau het alles zämmä grächnet und s Siegerteam bekannt geh. Gaaaanz knapp isch dr Sieg an d Mannä gangä. Jä nu, mir Frauä hei alles geh und si scho chli froh hei d Mannä gunnä, suscht hättä si den plötzlich kei durscht meh gha oder wärä no ohni znacht is Bett. Hiiiii.

Zyt isch langsam cho, wo s heisst sich z verabschidä. Ufem Hof hei ganz tolli Lüt gschaft und mit Ihnä heimer ä super schönä schönä Tag dörfä verbringä. Wo alli im Car ghockt si het dr Dodo s witerä vorgehä a kündet. Er het gmeint mir fahrä jetzt no ä Stund bis mr an eusem Schlofplatz a chömä. Nach knapp zäh Minutä het dr Car bimä Schloss a ghaltä und s het gheissä „usstiegä mir si do“. Scho bim usstiegä het mä gmerkt das es ä bsunderä Ort isch, mä het sich grad chli wiä ä König oder Königin gfühlt. Das Schlössli heisst Schwandegg und lit in Waltalingen das isch im Zürcher-Oberland und gränzt an Kanton Thurgau. Mir hei grad dörfä Zimmer bezieh und das ganzä chli uskundschaftä. Nachärä halb Stund hets uf dr wunderschönä Terassä wo mä ä super usblick gha het s Apero geh. Es hei interessanti gspröch statt gfundä und mä het das super Wätter so richtig chönä gniässä. Nachem Znachtässä heimer eusi Terassä igrichtet mit Bänkli, so das alli äs Plätzli gha hei. Sisch Musik glofä , chli Füür hets gha und natürlich Mineralwasse oder so. So heimer dä a brocheni Obä alli zämmä lo usklingä und bis in d Nacht ihnä no chli pläuderlet und glachä.

Am Sunndig Morgä am halb achti si (fascht) alli wach und parat gsi zum zmorgäässe. Nach derä stärkig heimer bereits scho wider euses Schloss verloh und si mitem Car los gfahrä. Es isch ä sehr ruhigi Fahrt wordä s het doch dr eint oder ander chli Schlof nochgholt. Euses nächschtä Ziel isch im Appenzellerland gsi. Kronberg nennt sich das ganzä. Dört hets ä Bobbahn und ä Seilpark zum sich vergnüägä. Mä het ä rasanti Fahrt ins Tal dörfe machä. Das isch natürlich au sehr Witzig gsi und het au allnä sehr vill Spass gmacht. Zum chläterä hets den scho chli muät brucht, es chöne jo au nid alli schwindelfrei si, trotzdäm hei die wo sich das getraut hei, sehr vill spass gha. Vorallem hets immer öbis z lachä geh wemä so diä Gsichter beobachtet het. Gwüssi hei sehr spektakuläri gestänä grissä uf denä Seil, wo eifach zum grölä gsi isch.

Mit dr Zyt het langsam aber sicher het d Energy nochägloh und ä stärkig oder ä Ruhephasä het anä müäsä.

S Restaurant isch grad näbä dr Bobbahn gsi, vo dört het mä dä ganz Park gseh. Mir hei die ganzi Dachterrasse für eus ällei gha. Die einte hei pläuderlet und d Sunnä gnosse und anderi hei chli pfüüselet uf dä Ligstüähl. Zum Znachtässä isch Grilliert wordä und ä richhaltigs Salatbuffet isch für eus part gstandä. Das het natürlich alnnä gmundet und isch au sehr guet gsi.

Langsam isch ufbruchstimmig uf cho. Mir hei eusi siebä sachä zum letschtä mol packt und hei au dä Ort wider müäsä verloh.

D Cliquereis neigt sich also im ändi zuä. Nachärä riibigslosä Heifahrt simmer am halb sibni z Füllinsdorf zum Car usgstiegä. Es si zwöi super schöni Täg gsi womer mitänander verbrocht hei. Es isch eifach dr Hammer wemä so sachä cha und dörf erläbä womä soo schnäll nümä wird vergässä.

An derä Stell dank ich im Dodo und dr Bea ganz härzlich fürs Organisierä vo dr Reis. Isch wunderschön gsi.

Sabrina (Rälli)Heusel Sabrina
08 Mär

Bummel

Bummel 2015

 

Willkomme liebi Leserin, liebe Leser zum Bricht vom diesjährige Elbisrugger Bummel

Mir hän eus alli – diä einte frühner oder spöter – gemäss Info uf em Amäldezettel am 07.30h bim Rüsselhuus (Elefantehuus) troffä.

Dr Car isch bereits barat gstande, d Instrument und Chinderwäge sin verlade worde und looos isch es gange…

Scho grad gli nach dr Abfahrt in Füllinsdorf het eusi diesjährige Bummelleitig d Gribschmi GmbH uns witeri Infos zuecho lo. Alli Aktivmitglieder hän e selber verschönerets gelbs Tüechli und e – i hätt fascht gseit Serviettering – nei e Tüechlihalter natürlig ;-) mit dä nötige Alegg-Instruktione usghändigt becho. Yeaaahhh Elbis-Pfadfinder „on tour“! J

Als nögschts het jedä Bummelteilnehmer es Lunch-Säckli becho. Unter dr fachkundige Demonstration vo dr Schmidi und dr internationale Erklärig vo eusem Gribi isch uns erklärt worde, für was welle Gegestand in däm Säckli dänkt isch.

D Fahrt het gmütlich ihre Lauf gno. Die einte hän d Zit gnützt zum nomol e Powernapp z mache, die andere häns gnosse sich wieder z gseh nach 1 Wuche Pause

Churz vor em erschte Halt hän de eigentli scho alli gwüsst wo’s ane goht, d Strecki het nüm viel Alternative übriggloh und euse Chauffeur het sich denn sozsäge „verschwätzt“.

Mir hän z Meiringe im schöne Berner-Oberland bi strahlendem Sunneschiin und wunderbar blauem Himmel Halt gmacht. Usstiegä und Instrument uslade isch dr nögschti Uftrag gsi. Diä einte hän s Zytfenschter vom Uslade vo dä grosse Instrument no gnützt zum e mehr oder weniger dringends Bedürfnis (WC Pause) z erledigä – me het jo nid gwüsst, wenn diä nöschti Glägeheit drzue wird cho ;-)))

So sin mir also in dr bekannte Formation und d Liederlischte „vo obe abe“ spielend Richtig Bergbahnstation marschiert. Dört hän mr alli e Billette usghändigt becho und es het gheisse „istiege“. Mit dr nögschte Gondlä isch es richtig Hasliberg-Reuti duruf gange. Obe acho hän mr e Momentli uf eusi Gspändli mit dä grosse und eher sperrige Instrument müesse warte. Ganz spontan hets bi Akunft vo dr Gondlä e „Geng-Beng Willkommens-Session“ geh! J

Aber es isch no witer uf e Berg ufe gange, Mägisalp isch denn diä vorläufigi Endstation gsi. Wo alli acho und barat gsi sin hän mr es paar Stückli us eusem diesjöhrige Repetoire zum Beschtä geh. Zur Fröid vom awäsende Publikum. Es isch würkli dr Hammer gsi bi däm super Wetter zmitts im Schnee dörfe z‘spiele. S Publikum isch dr Hammer gsi und het eus fescht applaudiert und natürlig no mehr vo eus wellä ghöre. Jetzt hets aber zerscht emol e Pause geh. Do mir nid genau gwüsst hän wenn’s witer goht, hän diä einte öpis drunke, anderi hän sich mehr oder weniger usgwoge verpflägt ;-) Au dr Umsatz für Sunnebrüllä isch an däm Daag wohl markant agstiege, het doch dr eint oder ander vo uns eini müesse go poschte ;-) Sogar e ganzi Chischte Bier hän mr gsponseret becho! Diä hän mr natürlig – bevor s wieder dr Berg durab gang isch – mit es paarne witere Fasnachtsliedli verdankt. Sogar e ehemoligs Mitglied – dr Pascal Bürgin – wo sit längerem in Meiringe dehei isch het dr Wäg zu eusem Zwüschehalt gfunde und het eus selber tatkräftig uf em Susaphon unterstützt.

Dr nögschti Halt und „Uftritt“ hän mr in dr Station Bidmi „absolviert“. Au dört het eus s Publikum ufmerksam zueglost und applaudiert. Mir hän e witeri Pause igleit. Da mir unterdesse erfahre hän, dass es no e Moment goht bis zum eigentli Mittägässe het me Glägeheit gnutzt mit öpis Chlinem s ufträttende Hungergfühl z beruhige.

Wieder guet an dr Talstation aglangt isch es in Marschformation durch’s Dorf Meiringe gange. Sofort isch dr Strooserand mit begeisterete Chinder gsäumt gsi und s einte oder andere Fänschter isch offe gstande.

Endlig bim Restaurant aglangt, hän mr mit eusem „Elbisrugger“ uf eusi Akunft ufmerksam gmacht. Es hän alli fescht Hunger gha und so sin alli Plätz gli bsetzt gsi und mir hän e feins, wohlverdients Mittagässe gnosse.

S Ässe hän mir – wie sich’s ghört – mit em Spiele vo witere Stückli verdankt und sin nomol in dr Marschformation retour zum Car gloffe wo am Bahnhof uf eus gwartet het. Es isch speditiv verlade worde und mir hän d Heimfahrt chönne aträtte.

S Gribi het eus flissig animiert 2,3 Liedli z trällere somit isch eus d Heimfahrt bi mehr oder weniger stockendem Verchehr nid so lang vorcho.

Bi eusere Rückkehr in Füllinsdorf hän mr denn nomol diffig usglade und dr Elbis-Kreis het sich für diä letschtä Stück in derä Saison gschlosse. Als Abschluss het sich dr 2li bi allne Aktivmitglieder einzeln bedankt. D Sandra het e grosses Dankschön an d Gribschmi Gmbh für dä super tolli Bummel-Daag usgsproche und mir hän eus alli vonenand verabschiedet.

 

Viele Dank au vo minere Site, es isch e super Daag gsi!



Geschrieben: Karin Tschopp   Tschopp Karin